Pregontas/Rispostas

In custas pàginas proamus a rispòndere a sas dificultades chi tenet chie iscriet in limba sarda, mescamente aplichende sas règulas de sa Limba Sarda Comuna.

Dificultades de lèssicu o de terminologia, ca a bias in s'impreu de cada die sunt prus fortes sas influèntzias italianas o inglesas (barbarismos) o si sunt imponende espressiones o maneras de cuncordare sa frase chi non s'addatant a su sardu, ma sunt sinnale de un'influèntzia esterna, mescamente italiana.
Est craru chi si tratat de cussìgios, chi non podent èssere un'òbrigu. Però, si totu nos assugetamus a sas règulas, at a bènnere mègius a sa limba e a nois. Ca cada limba tenet su gèniu suo, ma finas règulas. Su sardu che a sas àteras limba.
Si est beru chi sas règulas sunt traballosas a imparare, est finas beru chi cando nche las amus imparadas nos dant fortza pro nos espressare e seguràntzia pro comunicare.
Ca una limba regulare e cuncordada bene cuntentat e acùrtziat chie la faeddat e chie la leghet o l'ascurtat.
In prus, cun una limba regulare e coerente at a èssere mègius si cherimus chi sa limba siat reconnota e rispetada in cada àmbitu e impreu, si cherimus chi siat ufitziale che a sas àteras. Sena contare chi benit finas mègiu a l'imparare.

Diegu Corràine